تسريب حصري: الزعيم يرفض الوحدة مع موردي «الرز»!
(1)
* فخامته عاوزك الآن؟
- طيب ليه باعتكم في الوقت المتأخر ده.. ما هو سيادته دايما بيدّيني «ميسد كول» وأنا أطلبه لأنه زي ما أنتم عارفين بيخاف على رصيده في التليفون عشان مال عام، وهو سيد من يحافظ عليه زي ما كلنا عارفين!
* والله مش عارفين.. بس هو شدد علينا لازما وحتما ولا بد نجيبك عنده فورا..
- خير اللهم اجعله خير.. دقيقتين بس ألبس وأجهز نفسي.
(2)
وزادت عمليات التفتيش كلما دخل ردهات القصر. شعر بغصة في حلقه، خصوصا أنه شاهد كثيرين أقل منه أهمية ومكانة يدخلون ويخرجون بدون تفتيش. لكنه لما وصل إلى باب غرفة مكتب الزعيم فوجئ أن إجراءات التفتيش تتطلب أن يخلع كل شيء.
* سأل في استغراب ودهشة: كل شيء؟! متأكدين كل شيء.. يعني كل حاجة؟!!
- أيوه يا فندم.. التعليمات كده.
(3)
بعد عناء استفاق من قسوة المفاجأة. ودخل على الزعيم منكس الرأس.
* يا فندم.. يرضي سيادتك البتاع اللي حصل لي ده.. لو عاوز سيادتك تستغنى عني مفيش مشكلة.. بس مش بالإهانات دي والبتاع ده؟
- إهانات إيه بس يا «ترباس يا ناقص» واستغناء إيه اللي أنت جاي تقول عليه.. أنت عارف قبله معنى الاستغناء إيه لم تتكلم عليه.. أنت عارف أنا ما استغناش عن رجالتي أبدا.. المعلم بحق وحقيق يتمسك بصبيانه مهما حصل.. «سحيح» ممكن استغنى عن وزير مدني «صايع ضايع» لأن الخمسة منهم بقرش.. لكنك يا «ترباس» تربية مؤسسة عظيمة قوي.. ده أنت حتة مني يا راجل..
* أمال سيادتك ليه كل البهدلة دي؟
- إجراءات احترازية بس عشان ابن الحرام اللي بيصطادك كل مرة ويخبي مايك التسجيل في جسمك وبعدها الدنيا تسمع التسريبات!
* ترباس خجلا: مفيش مشكلة يا فندم.. ومسيري هعرف الكلب اللي بيعمل كده وأطلع.......... أمه..
- ترباس خد بالك.. بلاش الألفاظ دي.. التسريبات فضحتنا الله يكرمك.. حاول تتعلم الأدب والألفاظ الحلوة زي حبيبنا توفيق عكاشة كده.. نفسي توصل لمستواه.. وعشان مصلحة «الوتن» اللي هو «الحودن اللي بيضمنا» لازم يا ترباس تتحمل أي إجراءات تفتيش حتى لو دخلوا في جسمك منظار للبحث عن أي «مايك» مستخبي هنا ولا هنا..
* حاضر يا فندم.. جسمي فداء لسيادتك وللوطن وللبتاع.. لكن سيادتك بعت لي ليه دلوقتي.. فيه حاجة كفالله الشر؟
- أيوه.. حاجة مهمة وخطيرة.. أنا نفسي يا ترباس بعد النجاح الكبير اللي عملناه بفضل الله على المستوى الداخلي.. والخير بقى للركب زي ما احنا شافين..
* ترباس مقاطعا ومتنحنحا: طبعا يا فندم.. طبعا.. الخير للركب..
- ما تقاطعنيش تاني يا ترباس يا ناقص.. بقولك زي ما عملت إنجازات داخلية كده عاوز إنجاز كبير خارجي الدنيا تتهز له.. حاجة تخض وتخلي العالم يحكي ويتحاكى بيا..
* فكرة مدهشة يا فندم.. بس العالم بيحكي ويتحاكى فعلا بسعادتك.. بعد كل تسريب بتكون سيرة جنابك على كل لسان!!
- ما هو من خيبتك.. بص عاوزين إنجاز بجد.. هقولها تاني إنجاز بجد يا ترباس..
* أؤمر سيادتك وأنا أنفذ.. تحت أمرك لو طلبت لبن العصفور أو «رز بلبن» بعون الله نجيبه..
- لبن إيه وزبادي إيه.. الحاجات دي قدمت خلاص.. عاوز إنجاز سياسي يا ترباس..
(4)
- عاوز «وحدة»..
* بعد الشر عن سيادتك.. وحدة إيه اللي سيادتك عاوزها.. إزاي عاوز تكون وحداني.. يجي وقتها لسعادتك اكتئاب والعياذ بالله.. هو فيه أحلى من اللمة واحنا حاولين سعادتك.. هههههه.
- افهم يا بني آدم.. عاوز «وحدة».. يعني احنا ودولة تانية يكون زيتنا في دقيقنا ونكون دولة واحدة..
* ههههه.. معلهش يا فندم.. ما جاش في بالي.. أصل الحاجات دي قديمة قوي من أيام زعيم دولة شقيقة في المنطقة اسمه جمال عبدالناصر..
- «سحيح» سمعت عنه.. بس هو عمل وحدة مع سوريا.. عاوزين جديد وتجديد..
* بالعكس يا فندم.. أنا شايف إن سوريا مناسبة جدا لأن «بشار» وسيادتك فولة وانقسمت نصين.. بينكم حاجات كتير مشتركة.. وانتو الاتنين بتحاربوا الشعب الإرهابي الدموي..
- على عيني وراسي «الأسد» واللي زيه.. بس أنا يا ترباس نفسي التاريخ يخلدني ويقوله ده عمل وحدة ما يغلبها غلاب مع دولة ما تخطر على البال..
(5)
- يا ترباس افهم.. أنت بنفسك قلت إنهم أنصاف دول.. وبعدين أنا زعلان منهم بقالهم فترة مطنشيني وما بعتوش ولا حباية.. خلاص خدنا غرضنا منهم.. نشوف غيرهم..
* ليبيا مثلا؟
- الله يرحمه.. لو كان «معمر» موجود كان ينفع وطلعنا بشوية رز كويسين.. لكن هناك ما تعرفش مين بيحكم دلوقتي.. كل حارة عاملة دولة لوحدها غير اللي ما يتسموا بتوع داعش.. دول ممكن يخطفوني لو رحت هناك..
* لا وعلى إيه وجع القلب.. طيب إيه رأي سيادتك في أميركا.. بلد كبيرة ورئيسها راجل كبارة..
- أنت نسيت يا متخلف المشاكل اللي بينا وبينهم من يوم ما نيمتهم من المغرب وأسرت قائد الأسطول السادس بتاعهم وخليت قفاهم يقمر عيش..
* صح يا فندم.. فاتتني الحكاية دي.. طيب قدامنا روسيا.. دولة فرز أول و «بوتن» بيحبك وبينكم «استلطاف»..
- « سحيح».. لكن برضه دول ناس دماغهم ضاربة.. شوية بيكونوا اللي بيقولوا عليها دي شيوعية ولا شيعية معرفش اسمها إيه.. وشوية رأسمالية.. يا عم احنا ناقصين وجع دماغ..
* إمممم... طيب إيه رأي سيادتك في إيران؟
- لا يا ترباس.. بيتكملوا فارسي.. وأنا ثقافتي فرنساوي زي ما أنت عارف..
* طيب حيث كده ما تخش سيادتك على فرنسا؟
- لا برضه.. ناس ما يمشوش معانا.. احنا بلد كبيرة يا ترباس ولنا عادات وتقاليد شرقية.. يعني شوف مثلا ماما المثالية عندنا الست المحترمة اللي ما سابت كباريه إلا ورقصت فيه.. ومامتهم المثالية.. احنا سمن بلدي.. وهما صناعي.. التركيبة مختلفة..
(6)
- عاوز تخلص مني يا ترباس وتموتني بـ «الإيبولا» يا مفتري..
* بعد الشر عن جانبك.. إن شاالله اللي يكرهوك من أعداء الوطن الإرهابيين.. بص سعادتك عرفت طلبك يا كبير.. عندي شوية دول شايلهم لوقت عوزة وللحبايب بس وحياتك..
- فرحني قول.. زي مين؟
* بنجلاديش..
- فين دي؟
* دي سيادتك تمشي على طول في الطريق الدائري خد شمالك.. هتلاقيها بعد إيران بشوية وأنت رايح كده على باكستان..
- عندهم «رز» دول يا ترباس؟
* لا يا فندم للأسف.. دول على باب الله زينا كده..
- طيب إيه الميزة اللي عندهم.. هناك إيه عشان ما أشحططش نفسي المشوار ده وأطلع على فاشوش..
* دول سعادتك بيعملوا حاجة مهمة جدا.. بيعدموا قادة الإسلاميين..
- الزعيم مهللا فرحا وقد تخلى عن وقاره: إيه!!.. معقولة!!.. الله أكبر.. هي دي.. بحب دي.. هاتولي دي.. من بكره نروح زيارة عمل وجهز عقد وحدة كاملة متكاملة فورا جاهز على التوقيع.. وعاوزك تتساهل معاهم يا ترباس يا ناقص وتعمل لهم خصم كويس.. جايلك يا بنجلاديش!
(7)
• shrief.abdelghany@gmail.com
@shrief_ghany
ليست هناك تعليقات:
إرسال تعليق