جتني رسالتها ...
هي عبارات" لا"
بل عبرات تسكب لمن هجر وقهر وقطع
على عتبات تذكر الموت تنقطع كل حضوض النفس وكبريائها
" يا خوي"
هل يفرحك خبر موتي وأنت لم تراني منذ سنين ؟ قاطعتني بسبب كلام الناس أو بسبب أرض ودنيا دنيئة أو لأي سبب!! ونسيت أيامنا و ماضينا وأخوتنا و عيشتنا مع بعض!! يوم كنت أنام في حضنك .. وتشوف سعادة دنياك في سعادتي يوم كنت تقدمني في طلباتي على نفسك وعيالك .. وحتى زوجتك!! يوم كنا نتقاسم " حلاوة " أبوي اللي يجيبها لنا وهو جاي من الدوام!! نسيت يوم كنت تمرض وأجلس جنبك افرك يدي مدري وش أسوي عشانك وكيف أزيل آلامك.. ويوم كنت أمرض وتسرع بي للمستشفى تخاف علي من إحساسي بالألم.."واليوم أنت كل الألم"
...
آآآآآه يا خوي
كيف قلبك وسع كل هالكون والناس اللي فيه من عدو وصديقو" ضاق " على أختك وزوجها وعيالها!! وش أقول لعيالي وهم يسألوني عنك أقول " خالكم " مايبيكم ولا يبي شوفتكم! كيف أقولها وانا حضنت عيالك في حجري وياكثر ما ناموا على يدي واليوم " تطرد " عيالي من دنياك وهم يدورون عليك!
ياخوي
وش حال قلب أبوي وأمي وهم يشوفون تقاطعنا كذا!! وش حال قلبك لو شفت عيالك متقاطعين قدام عيونك وأنت تضرب بيد على يد من قلة الحيلة وكلك أسف..ياخوي
عجز الكلام
قصيدة / جتني رسالة
لكنها رسالة من نوع آخر ..
رسالة مبكية .. أدمت القلوب قبل المُقل
للشاعر / حمود الشمري
جتني رسالة من صدى خافق الروح
(للشاعر حمود الشمري)
جتني رسالة من صدى خافق الروح
وقريتها باحساس قلبي وروحي
قريتها وانهزّت قصور وصــــــــــروح
وانا من أول عالياتٍ صروحي
تشكي تقول القلب يا خوي مجروح
ما تدري اني غايراتٍ جروحي
تهل دمعٍ وترفع الصوت بالنوح
واللي فقد غاليه لازم ينوحي
ما كلمتني يمكن الصوت مبحوح
من النوح والا ما استطاعت تبوحي
جتني رسالتها بها دموع وجروح
وانهد با سباب الرساله طموحي
تقول يا خوي الزمن صار مفضوح
والشيب فيني لو تشوفه يلوحي
يابوعلي مالي بالغراب مصلوح
مادام قلب اللي نحبه شحوحي
ودي بشوفك دام الاعمار بفسوح
قبل الرحم يا خوي منا يروحي
زل الزمان اللي به أفراح ومزوح
أنخاك تكفى لاتظنها مزوحي
وبعد الرساله صار بالقلب ذابوح
طار المنام وصار فكري يشوحي
أختي رسالتها لها القلب مفتوح
كلي لها والقلب ينصت ويوحي
أقولها ودموع عيني لها فوح
وسط المحاجر دم عيني يفوحي
أجاوب الورقا على عالي الدوح
وانوح من فرقى الرفيق السموحي
والله لو إني وسط الاطباق مذبوح
لاظهر كما خطو الحصان الجموحي
واقول ياعين المها مابها شروح
لو تطلبين الروح تفداك روحي
جتني رسالة من صدى خافق الروح
وقريتها بإحساس قلبي وروحي
قريتها وانهدّت قصور وصروح
وأنا من أول عالياتن صروحي
تشكي تقول القلب يا حمود مجروح
ما تدري اني غايراتن جروحي
تهلّ دمع وترفع الصوت بالنوح
واللي فقد غاليه لازم ينوحي
ما كلّمتني يمكن الصوت مبحوح
من النوح وإلا ما استطاعت تبوحي
جتني رسالتها بها دموع وجروح
وانهَد باسباب الرسالة طموحي
تقول ياحمود الزمن صار مفضوح
والشيب فيني لو تشوفه يلوحي
يا بو علي مالي بالأغراب مصلوح
مادام قلب اللي نحبه شحوحي
ودّي بشوفك دام الأعمار بفسوح
قبل الرحم يا خوي منا يروحي
زلّ الزمان اللي به أفراح ومزوح
أنخاك تكفى لا تظنّه مزوحي
وبعد الرسالة صار بالقلب ذابوح
طار المنام وصار فكري يشوحي
أختي رسالتها لها القلب مفتوح
كلّي لها والقلب ينصت ويوحي
أقولها ودموع عيني لها فوح
وسط المحاجر دمع عيني يفوحي
أجاوب الورقا على عالي الدّوح
وأنوح من فرقا الرفيق السموحي
والله لو إني وسط الأطباق مذبوح
لأظهر كما خطو الحصان الجموحي
وأقول يا عين المها ما بها شروح
لو تطلبين الروح تفداك روحي
ليست هناك تعليقات:
إرسال تعليق